Esperanto Strasbourg

Kion kunporti de Strasburgo ?

Emmanuelle — 2025-10-12T15:58:53Z


Kougelhopf: (photo : E. Richard)

Kukaĵoj

Koncerne kukaĵojn, oni ne plu nombras la variajn brioĉspecojn : la kougelhopf estas la plej konata kaj glate eltenas vojaĝon. La famaj kaj nenombreblaj bredle, biskvitoj bakitaj kelkajn semajnojn antaŭ Kristnasko, kiujn oni ofertas al aliuloj aŭ sin ofertas.

Porkaĵo

Pri porkaĵo, Alzaco ofertas nekompareblan elektgamon. La plej bonaj viandkuiraj, porkaĵkuiraj kaj pladkuiraj metiistoj de Strasburgo havas tre aŭskultindajn konsilojn.

Vino

Kelkajn botelojn da fajngustaj alzacaj vinoj, selektitajn de la plej bonaj vinkelistoj, oni kompreneble ankaŭ mendu por akompani ĉiujn tiujn frandindaĵojn.

Muzeoj kaj kulturo

Emmanuelle — 2025-10-12T15:55:36Z

Muzeoj, operejo, teatrejoj, muziko, nunepoka arto… Strasburgo kaj ĝia regiono posedas multnombrajn kulturajn famajn instituciojn. Tie oni senpene trovos ion, por aranĝi enhavriĉan kaj diversecplenan programon !

Strasburgo disponas je reto da dek unu urbaj muzeoj, kies hereda riĉeco estas eminenta. La laŭtemaj kolektoj havas mirindan diversecon.

Tial, estos ekzemple eble :

konatiĝi kun la riĉa historio de Strasburgo en la historia muzeo : Musée Historique,
ensorbi la inspirajn trajtojn de la popolaj alzacaj artoj kaj tradicioj en la alzaca muzeo : Musée Alsacien
malkovri la plastikistojn de la nova generacio en la muzeo pri moderna kaj nunepoka arto : Musée d'Art Moderne et Contemporain
delektiĝis per originalaj kaj ofte mensoskrapaj verkaĵoj, prezentataj en la muzeo Tomi Ungerer – internacia centro pri ilustrarto : Musée Tomi Ungerer – Centre international de l'Illustration

Por flankenpâsi el kutimaj padoj, oni havos tutan elektgamon inter misterplena vodua kastelo (Château Vodou) aŭ, du paŝojn for, pasi-sprona milita muzeo (musée militaire) (en la Wantzenau) aŭ apetitveka muzeo pri ĉokolado Musée du Chocolat (en Geispolsheim)…

Aliaj sugestoj por amatoroj de scienco :

Planetario : Por malkovri kosmon tra spektakloj. Taŭgas por familioj. Proksime de la kampuso. https://www.cite-sciences.fr/fr/au-...
Le Vaisseau : Scienca centro por infanoj kaj gejunuloj, kie ili interagados por esplori la universon. https://www.levaisseau.com/


Le palais Rohan, qui abrite 3 musées : le musée des Arts décoratifs, le musée des Beaux-Arts et le Musée archéologique: (photo : B. Flochon)

Alzaca gastronomio

Emmanuelle — 2025-10-12T15:40:00Z

Ne malpli ol 33 stele distingitajn restoraciojn oni listigas en la Michelin gvidlibro en Alzaco, tio faras el Alzaco unu el la francaj regionoj plej provizita je altrangaj restoracioj. Ene de tiu ĉi listo, Strasburgo estas ĉe bona pozicio, ĉar ĝi ofertas plurajn sensoravajn ĉeestindajn manĝotablojn.
Pli ĝenerale, Strasburgo ofertas eĉ embarase elektotroon, ekde la rapidmanĝejoj ĝis altrangaj restoracioj, ne forgesante establojn, kiuj estas malfermitaj al alilandaj kuirartoj.
Ĉu vi ĝuos delektiĝi mergante vin samtempe en tipe alzacan etoson ? Ne forlasu Strasburgon sen esti manĝinta en vingastejo (Winstub) !

Vingastejoj


Choucroute alsacienne

Vingastejoj estis origine sufiĉe popolaj lokoj, kreitaj por ebligi al vinfaristoj forvendi sian produktitan vintroon, tenante restoracion rekte en sia hejmo.
En gastama kaj rustika etoso, vino estis alportata en kruĉeto akompanata de etaj laŭgrundtrajtaj kaj hejmfaritaj pladoj.
Hodiaŭ, vingastejo estas tia speco de restoracio, en kiu oni manĝas tuŝ-apude de siaj sidnajbaroj en komune korvarma etoso, ĉe tablo kovrita de ruĝkvadrata tablotuko. Oni tie drinkas, manĝas kaj reimagas la mondon alimaniere… Oni tiam dediĉas tempon por plene travivi sian vivon !

La unua alvokiteco de la vingastejoj estas servi vinon. Ĉetabliĝinte en unu el tiaj establoj, vi do havos okazon gustumi vinojn loke produktitajn, en Alzaco. En iuj strasburgaj vingastejoj, oni eĉ povas gustumi ilin en etaj tipaj glasoj, kiujn oni nomas rutscherle.
Tiuj etaj glasetoj estis tiuj, el kiuj oni tradicie trinkis vinon : la piedglasoj, pli rompiĝemaj, estis rezervitaj por dumfestaj tabloj. Kiel indikas ilia nomo (rutscha signifas gliti), oni glitigis ilin sur la tablon, por servi la tutan vingastejumantaron.

La vingastejo estis nekontesteble LA tipa alzaca restoracio. Inter la iamaj gustoj, la etaj tradiciaj pladoj kaj aŭtenta ornamiteco, oni povas gustumi la tutan alzacan gastronomion. Oni citos ekzemple la Wädele (ŝinketo), la Grumbeerekiechle (terpoma platkuko), la Lewerknepfle (knelo el hepataĵo), la Presskopf (pasteĉo el kapo), la Bibeleskäs (kazeo kun ajlo kaj aromherboj), kaj kompreneble la Bäckeoffe kaj la saŭrkraŭton.
Dum la 19-a jarcento oni ekkonis saŭrkraŭton oficiale kiel faman alzacan pladon, konsistantan el kuirita brasiko akompanita de salaj viandoj. La vorto saŭrkraŭto devenas de Surkrut, kiu mem fontas el la germana termino Sauerkraut, kiu signifas “acida brasiko”.

Vinoj

La elstaraj blankaj vinoj de Alzaco ekhavis reputacion, kiu hodiaŭ ja transpasas la landlimojn de Francio.
Inter la elstaraj, etskalaj laŭgrundtrajtaj vinoj kaj admirinda diverseco da vitspecoj, Alzaco produktas pintkvalitajn vinojn.
Multnombraj produktistoj turniĝas hodiaŭ al ellaborado de ekologikongruaj aŭ naturaj laŭgrundtrajtaj vinoj.
La vinŝoseo de Alzaco, preter ĝia mirinda vojlinio ĉe la vogezaj vitejkovritaj deklivoj, estas ja bela aventuro.
Fajnkonemuloj povas tie ekkoni kelkajn sensoravajn likvaĵojn, el ili mirindaj ruĝaj vinoj.


Verres à vin d'Alsace: (photo : E. Richard)

Historiaj vinkeloj de la strasburga hospitalo

Ege diskreta, lokita en la korto de la civila hospitalo, ĝi estas unika en la mondo. Superba, ĝi ŝirmas sub pompaj volvoj sesdekon da kverkolignaj vinbareloj, kiuj datumas de la 18-a kaj de la 19-a jarcentoj. La plej impona atingas volumenon da 267 hektolitroj ! Iuj el ili estas veraj teknikaj prodaĵoj (antaŭa flanko ovoforma, malantaŭa flanko ovala aŭ perfekte ronda). La bareloj enhavas la plej pinte bongustajn likvaĵojn de la vinberistaj koncesiuloj de la vinkelo : riesling, gewurztraminer, pinot kaj aliajn vitspecojn…
Ĉiuj vendataj en la butiko.

Strasburgo : La eŭropa kvartalo

Emmanuelle — 2025-10-12T15:34:54Z

La eŭropa parlamentejo

Konstruita el vitro, metalo kaj ligno, tiu eksterordinara elipsforma konstruaĵo kun eksternormaj dimensioj estis inaŭgurita en 1999. Ĝiaj konceptintoj imagis ĝin kiel ŝipegon, kies pruo disfendos la marondojn. Ideale lokita ĉe la bordoj de la rivero Ill, ĝi ĝuas maksimuman vidatecon. Spirhaltige prilumata vespere, ĝi imponas kaj igas la lokon okulrava.
Ĝia interna korto estas ĉefverko da runditecoj. Preter ĝia vasta duonciklo, ĝi havas 1100 oficejojn kaj 18 komitatĉambrojn ĉe tuta surfaco, kiu ampleksas 220 000 kvadratmetrojn, disigitajn ĉe 20 etaĝoj !
La “Parlamentarium” (parlament-prezentĉambro) Simone Veil, ebligas, dank' al ĝia 360°-kinejo kaj al ĝiaj tuŝekranoj, pli bone kompreni la rolon kaj funkciadon de la eŭropa parlamento.

Por vizitoj de la duonciklo kaj de la Parlamentariumo, trovu pliajn informojn ĉe la retejo de la eŭropa parlamentejo : https://www.europarl.europa.eu/visiting/fr/

La Palaco de Eŭropo

Ĝi estas la sidejo de la Konsilio de Eŭropo ekde 1977, jaro de ĝia inaŭguro. Ĝi estas monumento emblema de la eŭropfavora engaĝiĝemo de la urbo, ja grava al koroj de strasburganoj. Ekstere, ĝi prezentas fortikan arkitekturon, kiu simboligas la forton de la Unio. Fronte, la rotondo kaj la flaglinio reprezentas la 46 membroŝtatojn. Interne, oni trovas la plej grandan duoncirklon de Eŭropo kaj ne malpli ol 1350 oficejojn.
Ĝi estas verkaĵo de la franca arkitekto Henry Bernard. Ĝi randas la tre agrablan parkon Orangerie.

Por scii pli, vizitu : https://www.visitstrasbourg.fr/decouvrir-strasbourg/les-incontournables/le-quartier-europeen/f223007623_le-conseil-de-l-europe-strasbourg/

La Palaco de la homaj rajtoj

Ĝi gastigas la eŭropan kortumon pri homaj rajtoj, jurisdikcio privokebla de 800 milionoj da eŭropanoj. Inaŭgurita en 1995, la strukturo prezentas aŭdacan arkitekturon. Ĝiaj du metalaj cilindroj havas disaspektan estetikon kaj simboligas la pesilon de la justico.
Ĉe la enirejo, la fasado el vitro estas esprimo de travidebla justico. Verkaĵo de Sir Richard Rogers, le palaco de homaj rajtoj radias impreson de vera potenco : vertikalaspekta vidata el la fronto, horizontalaspekta vidata el la malfronto kaj el la flankoj. Ĝi perfekte harmonie kongruas kun la apuda rivera meandro.


Le Palais des droits de l'homme: (photo : B. Flochon)

Por scii pli, vizitu : https://www.visitstrasbourg.fr/decouvrir-strasbourg/les-incontournables/le-quartier-europeen/f223007624_le-palais-des-droits-de-l-homme-strasbourg/

La « Lieu d'Europe »

Instalita en vilao de la 18-a jarcento, la Lieu d'Europe celas informi la ĝeneralan publikon pri la historio de Eŭropo, la eŭropaj institucioj, sed ankaŭ pri la proksimaj ligoj, kiujn Strasburgo flegas kun Eŭropo kaj la kultura riĉo de la diversaj eŭropaj landoj.
Ĉi tiu interŝanĝcela loko, malfermita al ĉiuj, proponas regulajn eventojn ligitajn kun eŭropaj aferoj : ekspozicioj, ludoj, debatoj, renkontiĝoj, projekcioj, kaj multaj aliaj.
Jen interesa loko por pli bone kompreni Eŭropon !

Por scii pli, vizitu : https://www.visitstrasbourg.fr/decouvrir-strasbourg/les-incontournables/le-quartier-europeen/f223012048_lieu-d-europe-strasbourg/

La sidejo de Arte

La sidejo de Arte, la eŭropa televidkanalo, staras ĉe la bordoj de la rivero Ill, proksime de la eŭropa kvartalo. Elpensita de la arkitekto Hans Struhk, la nunepoka kaj sobra konstruaĵo, lasas ĉeesto-spacon por la naturo, interalie dank' al ĝiaj du internaj kortoj kaj al ĝia pendanta ĝardeno.

La eŭropa farmakopeejo

La eŭropa direkcio pri kuracila kvalito kaj sanzorgemo agas por normigi la kvaliton de la kuraciloj kaj ties atestadon eŭropskale. Ĝi havas sian sidejon en Strasburgo ekde 2007. Tiu konstruaĵo, konceptita de du arkitektaj studfirmaoj Art & Build kaj Denu & Pharadon, enhavas laboratoriojn, oficejojn kaj laborkunsidejojn.

Strasburgo laŭ la fluo de akvo

Emmanuelle — 2025-10-12T15:31:17Z

: (photo : B. Flochon)

La bordoj de la rivero Ill

Ili ofertas bonegajn eblojn promeni kaj ebligas ĉirkaŭiri la urbon kaj ties kuriozaĵojn, tute ignorante la urban trafikon. Zorgoplene aranĝitaj, ili ebligas admiri la ĉefajn monumentojn de la urbo kaj gapvagi en la kvartalo eta Francio.

La panorama teraso de la Vauban baraĵo

Kelkmetrojn for de la kovritaj pontoj (Ponts Couverts), la Vauban baraĵo aŭ granda kluzo – ĉar ĝi laŭnecese ebligis inundi la tutan sudan parton de la urbo – estis konstruita ĉirkaŭ 1690 de Tarade laŭ la planoj de la militista inĝeniero Vauban. Pinte de la konstruaĵo oni aranĝis agrablan panoraman terason, el kiu eblas per unu rigardo plenokulumi la urbajn kaj kanalajn aranĝstrekaĵojn.

La kovritaj pontoj

Plilongige al la kvartalo Eta Francio troviĝas la kovritaj pontoj. Ili gardis sian nomon spite al la malapero de la tegmento dum la 18-a jarcento. Ilin superas tri turoj de la 13-a jarcento, vestiĝoj de iamaj muregoj, kiuj garantiis la sendependecon de la strasburga respubliko. Tuj post la anekso de Strasburgo al Francio en 1681, novan zonon da fortikaĵo konstruis Vauban.

: (photo : B. Flochon)

La historia centro de Strasburgo

Emmanuelle — 2025-03-30T16:27:13Z

Strasburgo estas urbo influata de duobla franca kaj germana kulturoj, limdifinita disde Germanio per la riverego Rejno. En la eŭrometropolo de Strasburgo vivas pli ol 500 000 enloĝantoj. Ĝi famas pro gastigado de pluraj eŭropaj institucioj, el inter ili la sidejo de la eŭropa parlamento, kiu faras el la urbo unu el la ĉefurboj de Eŭropo, sed ankaŭ la sidejo de Konsilio de Eŭropo, de la eŭropa kortumo pri homaj rajtoj, la farmakopeejo (eŭropa direkcio pri kuracila kvalito kaj sanzorgemo), kaj multnombraj diplomataj reprezentoj.

“La Petite France” : La Eta Francio

Ĝi estas la plej pitoreska kvartalo de la malnova Strasburgo. Fiŝkaptistoj, muelistoj kaj tanistoj vivis kaj laboris malnovtempe en tiu kvartalo konstruita ĉe akvonivelo.
La mirinde belaj trabar-muraj domoj datumas de la 16-a kaj 17-a jarcentoj. Iliaj deklivaj tegmentoj estas malfermitaj al subtegmentaj ĉambroj, kie oni sekigis senharigitajn felojn.

La “Place de la République” (Placo de la Respubliko)

Tiun ĉi grandan placon kun aspekto de parko oni starigis inter 1871 kaj 1918. Ĝi situas meze de la “germana kvartalo”.
Post la malvenko de 1870, Germanio planis fari el Strasburgo la ĉefurbon de la federacia lando Alzaco-Loreno. La kvartalo tiam nomita “nova urbo” difinas novan urboplanismon kun novaj larĝaj cirkulvojoj, administraj kaj kulturaj konstruaĵoj kun impona aspekto kaj riĉmontraj loĝdomegoj. Tiu nova urboplanismo respegulas ankaŭ akutan pejzaĝ-plan-kapablon.
Ĉie ĉirkaŭe : la Palaco de la Rejno, la universitata biblioteko, la nacia teatrejo estas majestaj ekzemploj pri tiu imperia, grandioza sed agrabl-etosa arkitekturo.
Centre staras la memormonumento pri militmortintoj, starigita en 1936 de la skulptisto Drivier. Ĝi reprezentas patrinon kun siaj du filoj, unu mortinta por Francio, la alia mortinta por Germanio, drama situacio, kiun travivis alzacanoj dum ambaŭ mondmilitoj.

La “Neustadt” (novurbo) : la imperia germana kvartalo (1870-1918)

Tri antaŭurboj el kvar detruitaj, gravaj kaj multnombraj damaĝoj en la urbocentro, jen la akre peza bilanco de la sieĝo kaj de la franca malvenko en 1870.
Se la rekonstruado finiĝis ene de 5 jaroj, sternadon de la urbo, prokrastitan ekde la 18-a jarcento, komercaj medianoj firme skribis en la tagordon. Ili estis zorgemaj pri disponigo de pint-efikaj infrastrukturoj (stacidomo, haveno, taŭga cirkulad-aranĝo, ktp.) dum la politikaj aŭtoritatoj volis, ke la federacia lando Alzaco-Loreno, estu ekzemplodona ĉefurbo, grandioza, por la gloro de la imperio kaj de la germaneco.

Tial, en aprilo 1880 estas aprobita la nova gvidplano pri la nova urbo, tio estas 386 hektaroj aldone al la 230 hektaroj de la malnova urbokerno. La aŭtoro de la projekto estas J.G. Conrath, urba arkitekto ekde 1849. Li unue planis prestiĝan sektoron, rezervitan por oficialaj konstruaĵoj (imperia palaco, ministrejoj, sidejo de la regiona asembleo, biblioteko kaj universitato).
La tuton oni finis ĉirkaŭ la jaro 1900.
Konstruado de la alia sektoro, kun ĝiaj kolektivaj aŭ individuaj loĝdomoj, pli malrapide progresis kaj daŭris ĝis 1920.
Temas pri urba kreaĵo tre interesa kaj kies ekvivalento preskaŭ ne plu ie ajn ekzistas pro la detruoj de la dua mondmilito. Ĝi estas farita el placoj, larĝaj kaj disspacaj avenuoj, ornamitaj de arboj, kaj de pluraj lokoj, kie alianciĝas kun feliĉo monumenteco kaj harmonia akuta pejzaĝ-penskapablo (ekzemple la riverbordoj kun la preĝejo Saint-Paul).
La publikaj domegoj, la privataj domoj respegulas certan inklinon por historifonta eklektismo (itala aŭ germana nov-renesanco, nov-baroko, ktp.), meze de kiu stariĝas kelkaj tute mirindaj konstruaĵoj secesi-stilaj kiel la “egipta domo”.

La katedralo

La katedralo de Strasburgo estas gotika absoluta ĉefverko.
Konstruado de la romanika katedralo, el kiu nenio restas krom ĝia kripto kaj ĝia ĉegrunda okupateco, komenciĝis en 1015. La spajron de la nuna gotika konstruaĵo oni finis en 1439.


La katedralo de Strasburgo: (foto : B. Flochon)

“Proda frukto de giganteco kaj de delikateco” laŭ la vorto de Victor Hugo, ĝia fasado montras fantastan ornaman riĉon. La spajro, 142 metrojn alta, estas ĉefverko el leĝero kaj eleganteco. La katedralo estis ĝis la 19-a jarcento, la plej alta konstruaĵo de la tuta kristanaro.
Tri mensfrapaj taktoj ritmigas la viziton.


Kougelhopf: (foto : E. Richard)

Ekstere, la fasado estas kvazaŭ granda bildlibro de la mezepoko. Centoj da skulptaĵoj, kiuj ŝajnas malligiĝi disde la muro emfazas la lumajn kaj mallumajn efikojn. La koloro de la roza sablopetro ŝanĝiĝas laŭ la taghoro kaj laŭ la ĉiela lumradiado. Dum la someraj vesperoj, lumplena enscenigo estas rava sorĉo.
Interne, la alta kaj svelta navo instigas al profunda kontemplemo.
La vitraloj de la 7-a ĝis 14-a jarcento kaj la rozvitralo pelas al admirado. La monumenta orgeno posedas rimarkindan orgenfasadon kun aŭtomatoj.
La astronomia horloĝo datumas de la renesanco kaj ĝin pelas mekanismo de 1842, kiu mem estas ĉefverko. Ĝi pelas la vicparadon de la apostoloj, kiun eblas admiri ĉiujn tagojn je la 12a30.
Alireblo por homoj kun reduktitaj moviĝebloj ĉe la norda flanko.

Aliaj sugestoj :

Urbaj banoj : Bela loko kun romiaj banejoj, naĝejoj, saŭnejo . Historia konstruaĵo el la komenco de la 20a jarcento. Proksime de la kongresejo. https://www.bainsmunicipauxdestrasb...
Parko Orangerie : Granda kaj belega parko kun lago, grandaj aleoj, florbedoj, rimarkindaj arboj kaj statuoj. Proksime de la Eŭropaj institucioj.https://je-visite-strasbourg.fr/le-...
Botanika Ĝardeno : Pli ol 5000 specioj da plantoj. Lageto, forceioj. Agrabla loko por ripozi meze de naturo. Proksime de la kongresejo. https://jardin-botanique.unistra.fr/
Protestanta preĝejo Saint-Pierre-le Jeune : Gotika preĝejo rimarkinda pro ĝiaj freskoj, klostro, jubeo, orgeno de Silbermann.https://www.saintpierrelejeune.org/